AWÍLLASLARÍM

Arqań teńiz, qubla tawıń biyikti,Ashılısıp abadan jeriń iyipti,Paxta qırmanlarıń kókke tiyipti,Jeńisiń kóz aydın, awıllaslarım.

Tayımnan tabısıp, ósken úyirim,Qay jerde júrsem de burar búyirim,Búldirmey qanańnıń jalǵız túyirin,Teberik eteyin, awıllaslarım.

Namısıńdı júregime túyeyin,Dáwletińdi qırman etip úyeyin,Jawdırasqan kózlerińnen súyeyin,Altın bosaǵalı, awıllaslarım.

Tabısıń quwanttı tuwısqan eldi,Barlıǵı jıynalıp ortaǵa keldi,Adamnıń shaması gúreste belli,Palwanıń kóp eken, awıllaslarım.