Adam tanımasa aqtı qaranı,Áytewir bir júrgen «jániwar» bolar.Jigit xalıqtan qashıq tutsa aranı,«Jalǵız attıń shańı shıqpas» qor bolar.
Garga júz jıl jasap-jemtik shoqıydı,Nawqan qurt-júz kúnde jipek toqıydı,Kóz bar. Jazılmaǵan xattı oqıydı,Júrek soqır bolsa, saw kóz gór bolar.
Sulıwlıq sınaptay turmas uwısta,Gáwhar jatır bir qarańǵı quwısta,Qaytıp kórer dostıń menen urıspa,Kewil júhándey keń, tildey tar bolar.
«Qız patsha bolsa hám jolı tar» — deydi,Óytkeni, jat jurttan jawshı bar deydi,Jıllı sózge jılanlar hám zar deydi,Miriwbet bul — mehir quyash nur bolar.
Bilip aytqan er qádirin el biler,Arıslan bahasın bilse sher biler,Kelin qunın qız uzatqan jer biler,Zergerine tússe jez hám zer bolar.
Tentek tórde shalǵayaqlap jatırsa,(Jaǵımpazlar ziyapatqa shaqırsa),Esli jigit esik bette otırsa,Esik — japsar bolar, japsar — tór bolar.
Qúdiret kúsh bolsa da adam pármanı,Hárgiz ada bolmas arzıw-ármanı,Ómir sırın tutas bile almadım,Dúnya mákkar qatın, kimge yar bolar.