XALQlM

Seniń nápesińnen dúnyaǵa kelip,Ańlaǵanman jaqsı-jamannıń parqın.Sen maǵan bunshelli baxıttı berip,Ne degen miyirman, saqıysań, xalqım.

Bir diyqan shatpasında dúnyaǵa kelgen,Kegeyli boyında tal shıbıq mingen,Sen arqalı jetimlikten Jetilgen,Saǵan shın minnetdar balańman, xalqım.

On jetimde qolǵa vintovka alıp,Uzın shinel ayaǵıma oralıp,Men Berlinge deyin piyada barıp,Sen ushın okopta jatqanman, xalqım.

Alıs Oder dáryasınıń boyında,Jaralanıp, qanım aǵıp qoyınǵa,Jatqanımda tek sen bolıp oyımda,Kózden bir-bir ushıp turǵansań, xalqım.

Bálent juldızlarǵa eger qol sozsam,Dáryańnan saǵa alıp, bir salma qazsam,Jurtqa unatqanday bir qosıq jazsam,Bári seniń bergen yoshıńnan, xalqım.

Jolmurza aǵa ertken jaslay inim, dep,Sonda daǵı olpı-solpı minim kóp,Meni sıylap atırsızlar kúlimlep,Bári himmetińnen bolıp tur, xalqım.

Ulkenge sálemim qabıl etilse,Jası kishim qanat bolıp jetilse,Qız-kelinler degishpemdi kóterse,Barlıq mártebem tek ózińnen, xalqım.

Jigitler kóp mennen on ese alıq,Shayırlar kóp elge ataǵı tanıq,Qoymayın dep men hám qatardan qalıp,Seniń xızmetińde júrippen, xalqım.

Sen teńiz, men seniń tamshıńman jalǵız,Saǵan muhabbatım kemimes hárgiz!Baxıt bergen watanıma mıń alǵıs,Arǵımaqtay shapsın ıǵbalıń, xalqım!