Sadıq Nurımbetov

    Sadıq Nurımbetov — ataqlı xalıq shayırı.
S. Nurımbetov 1900-jılı Kegeyli rayonınıń aymaǵında tuwılǵan. Onıń shayırshılıǵınıń qáliplesiwinde aǵası belgili shayır Sıdıq Tokpan ulınıń tásiri kúshli bolǵan. Xalıq shayırı 1939-jılı Qaraqalpaqstannıń paytaxtı Tórtkúlge shaqırtılıp ádebiyatımızǵa jaqınnan aralasıwǵa múmkinshilik tabadı, basqa da jazıwshı-shayırlar menen birge Moskva, Tashkent kalalarında boladı.
Shayırdıń qosıqları 20-jıllardan baslap-aq xalıq arasına tarqala baslaǵan. Sadıq shayırdıń “Biziń watan” (1940), “Jeńimpaz xalıq” (1942), “Batırlar alǵa” (1944), “Baxtıyar” (1950), “Túlkishek” (1956), “Farxad” (1958, 1978), “Jipekshi Jańıl” (1961), “Jańa zaman jırları” (1962), “Qanalaslar” (1968) degen toplamları basılıp shıktı. Bunnan tıskarı shayır shıǵarmalarınıń eki tomlıǵı (1971,1972) járiyalandı.
S. Nurımbetov “Qaraqalpaqstan xalıq shayırı” (1942), “Ózbekstan xalıq jırshısı” (1957) degen xúrmetli ataqqa iye.
Ol ordenler, medallar hám Ózbekstan, Qaraqalpaqstan Respublikası Jokarǵı Keńesiniń Húrmet jarlıqları menen sıylıklandı.
S. Nurımbetov 1939-jıldan Jazıwshılar awkamınıń aǵzası.