Kewliń ashıq jigerli me,Kegeyliden suw alǵan qız?Apań suwǵa jiberdi me?Kegeyliden suw alǵan qız?

Qara kózleriń móldirep,Suwǵa barayın jáne dep,Shıqtıń ba, suwdı bánelep,Kegeyliden suw alǵan qız?

Sóz baylasıp júrgen qálep,Bolmasınshı kúnde hálek,Dep keldiń be, ruwxıń bálent,Kegeyliden suw alǵan qız?

Qanańızǵa zordan sıya,Gúl júzińnen tarap zıya,Sen bir gózzal búlbúl goya,Baǵıp óttiń qıya-qıya,Kegeyliden suw alǵan qız?

Iynaǵashıń jarasadı,Tolayım jurt qarasadı,Qardarıń kóp talasadı,Kegeyliden suw alǵan qız?

Jilwa taslap qádemleriń,Bir awız sóz sálemleriń,Qulpırtajaq — bul álemdi,Kegeyliden suw alǵan qız?

Kewliń tolqıp eljireydi,Qızıl sharshıń jelbireydi,Nege kóksiń dirildeydi,Kegeyliden suw alǵan qız?

Írayıńdı jıǵar dizden,Awlaq bolayın dep sózden,Tartındıń ba, ya jat kózden,Kegeyliden suw alǵan qız?

Kóz tikken soń dógeregiń,Hallas urar kókiregiń,Aytarmısań bir deregin,Kegeyliden suw alǵan qız?

Iyrim tartıp, pátli aǵıs,Mánzil gózlep barar alıs,Sen dep keldim, sózim qalıs,Kegeyliden suw alǵan qız?

Juwap izlep sawalıma,Taǵı keldim awılıńa,Qalıp júrme obalıma,Kegeyliden suw alǵan qız?

Qustay sergek qanat qaǵar,Tolqınlanıp suwlar aǵar,Kóńlim-kewlińdi baǵar,Kegeyliden suw alǵan qız?

Jalǵasınday jan sırımnııń,Jipek shashıń, qos burımıń,Túsermeken kóz qıyıǵın,Kegeyliden suw alǵan qız?

Máhiytaban qası kerme,Salıp hár kún júz mıń sherge,Pák siynemdi órtey berme,Kegeyliden suw alǵan qız?

Suwlar aǵar saydan-sayǵa,Siltey berme aydan-ayǵa,Ráhim áyle, Ómirbayǵa,Kegeyliden suw alǵan qız?