Qırqqız benen Aral teńiz arası,Jayılıp jatqan qaraqalpaq dalası,Barsakelmes, Ústirt, Gazlı qalası,Miynet toyın shalqıp toylasa bolar.

Abıray ushın at salıstıń báhárden,Miynetke záberdes xalqım ázelden,Qız benen jigiti bel buwar hár dem,Toy lipasın kiyip jaynasa bolar.

Tazajaptıń eki boyın jaylaǵan,Palwanları aq altındı jıynaǵan,Birinshilik ushın ózin saylaǵan,Xojeli mártlerin maqtasa bolar.

Qalıń toǵay shańǵııp jatqan jerleriń,Bostan etken Shomanaydıń ellerin,Maqtasa arzıydı qız-jigitlerin,Mártlik maydanına saylansa bolar.

Qoynı jazıq paxtakeshtiń mákanı,Al-Beruniy babamızdıń Watanı —Aq altınnıń hár jıl sayın mol káni,Jedelli elime mádátkar bolar.

Úlesiń salmaqlı, esapta barsań,Aq altın watanı qatarda narsań,Keleshekke tabıs penen bararsań,Xızmetińdi shayır jırlasa bolar.

Jumırtawda jas júregi tuwlaǵan,Paxtazarda mashinası zuwlaǵan,Dushpanlardıń júrekleri suwlaǵan,Mańǵıtlı elge alǵıs miyasar bolar.

Dalasında qulan kiyik oynaǵan,Shımbay, Taxta jarıslarda talmaǵan,Qatarınan hasla keyin qalmaǵan,Táriypińdi jazsam san dástan bolar.

Qaraqalpaq aydın jolda shalqıdıń,Miynetińe jer bawırın balqıttıń,Kemisi joq búgingi kún shadlıqtıń,Kóz aydın jeńisiń, maqtawǵa bolar.

Tuwǵan úlkem ullı jolda shalqıdıń,Miynet etip ráhát taptıń, balqıdıń,Tasa bersin ǵáziynesi xalqıńnıń,Meniń bar ıntıǵım tek saǵan bolar.